AҦCУAA  PЫБЖbbI
-------------------- Aҧcнынтәи aжәабжь ҿыцқәа --------------------


 
 Аҧсны имҩаҧысраны иҟоуп арратә ҽазыҟаҵарақәа

 

Хәажәкыра 21 инаркны 24-нӡа  Аҧсны имҩаҧысуеит арратә ҽазыҟаҵарақәа. Урҭ напхгара риҭоит Атәылахьчара Аминистрра Агенералтә штаб аиҳабы, агенерал Анатолий Заицев.

 

Агенерал ишиҳәаз ала, " аҽазыҟаҵарақәа раан аус рыдулахоит аибашьраан азхиара, ахьчаратә операциақәа рымҩаҧгара, атерриториа ашәарҭадатәра, иара убас Аҧсны атерриториа абиологиатә хьчара".

 

"Аҽазыҟаҵарақәа аҵыхәтәантәи рымҩаҧгара амш аан аус рыдааулоит аибашьратә операциақәа рымҩаҧгашьақәа, урҭ ирылахәуеит арратә мчқәа реилазаара злашьақәгылоу акқәа зегьы,"- ихаирҭәааит агенерал Заицев иҳәамҭа.

 

17.03.2006  Аҧсныпресс

 
 Сергей Багаҧшьи Михаил Бочарникови аҭынчра аиқәырхаразы аиҿцәажәарақәа рацҵара иалацәажәеит

 

Сергей Багаҧшьи Урыстәыла Аҳәаанырцәтәи аусқәа Рминистрра анашьҭымҭа ҷыда Михаил Бочарникови алацәажәеит аҭынчра аиқәырхаразы аиҿцәажәарақәа рацҵареи ақырҭуа-аҧсуа конфликт ҭынчратә мҩала аҭышәныртәалареи  ирыдҳәалоу азҵаарақәа рспектр зегьы. Урыстәылатәи адипломат ажурналистцәа ишреиҳәаз ала, акцент ҟаҵатәуп уажәраанӡатәи амеханизмқәа рҿы.

 

Уи иазгәеиҭеит аусуратә гуҧқәа  имҩаҧырго - аихамҩатә еимадара аиҭашьақәыргылареи Гал араион ахь ахҵәацәа рырхынқәреи реиҧш иҟоу - амеханизмқәа рхархәара аринахысгьы ишаҭаху.

 

15.03.2006 Аҧсныпресс

 

 Аҳәаанырцәтәи аусқәа Рминистр Сергеи Шамба: "Аҧсны ахьыҧшымра аиоуразы еиҳа азин амоуп, Косово аасҭа"

 

Аҟәа, Аҳәаанырцәтәи аусқәа Рминистр Сергеи Шамба ишиҧхьаӡо ала, Аҧсны ахьыҧшымра аиоуразы еиҳа азин амазар ҟалап, Косово аасҭа. Ари аҳәамҭа аминистр иҟаиҵеит, Америка Аҳәынҭқарратә Департамент иофициалтәу ахаҭарнак Шон Маккормак иқәгылара акомментари азуа.

 

Шон Маккормак иазгәеиҭеит, Еиду Америкатәи Аштатқәа  иуниверсалтәу амҩала арегионалтә конфликтқәа рҭышәныртәалара ишаҿагылоу, урҭ зегь хаз-хазы, рыспецифика иақәыршәаны рыӡбара иашаны ишырыҧхьаӡо.

 

Сергеи Шамба ари аҩыза азнеишьа "ҩбаны иҟоу астандартқәа" ирхыиҧхьаӡалеит. Уи иаҵшьны иазгәеиҭеит: "Аҧсны азакәантә, аҭоурыхтә, аморалтә ганқәа рахь ала азин амоуп қырҭтәыла апатронаж мап ацәкра.

 

Агеноциди аҧсуа амилаҭ рықәхреи рыҽрызкра қырҭтәыла анапхгара аҵаҟа аҟалара мап ацәкразы азин ҳарҭоит.

 

13 шықәса ҵуеит Аҧсны ихьыҧшым ҳәынҭқарраны иҟоижьҭеи. Ахақәиҭреи ахьыҧшымреи рхы ақәырҵеит шәҩыла Аҧсны аҿар. Урҭ ирылдыршаз мап ацәкра, қырҭтәыла аиҭалалара ҳалзыршо мчы ҟалараны иҟаӡам",- иҳәеит аминистр.

 

09.03.2006  Аҧсныпресс

 
 Аҧсны акоммунистцәа Ареспубликаҿы Асовет мчра ашьақәгылара 85 шықәса ахыҵра азгәарҭоит

 

Аҟәа, Аҧсны акоммунистцәа иазгәарҭоит аныҳәа Хәажәкыра 4 - Ареспубликаҿы Асовет мчра ашьақәгылара 85 шықәса ахыҵра амш. Уи иазку агәырҕьаратә еизара мҩаҧысит Аҟәа, Аҧсуа ҳәынҭқарратә драматә театр аҿы.

 

Аҳәынҭқарра Ахада ихьӡ ала акоммунистцәа дрыдныҳәалеит Апрезидент иадминистрациа анапхгаҩы Валери Аршба.

 

Ажәа хада ҟаиҵеит Аҧсны акоммунисттә партиа  Ацентралтә Комитет актәи амаӡаныҟәгаҩ Лев Шамба.

 

"Хәажәкыра 4 амш ҳара ҳзы - ҳтәыла ақырҭуа меншевикцәа рҟынтә ахы ақәиҭтәра иамшуп. Ари амш Аҧсны ауаажәлар зегь - рполитикатә, иара убас егьырҭ рдунеихәаҧшышьақәа  еиҧшымзаргьы, - еиднакылоит,"- ҳәоуп Апрезидент инаишьҭыз адныҳәалараҿы.

 

Иазгәаҭатәуп, Хәажәкыра 4 Аҧсны аҳәынҭқарра аиҭашьақәыргылара иамш-ныҳәаны ишазгәарҭо.

 

03.03.2006  Аҧсныпресс

 

Hit Counter