AҦCУAA  PЫБЖbbI
-------------------- Aҧcнынтәиәабжь ҿыцқәа --------------------


 

 Қырҭтәылеи Аҧсни рҳәааҿы апатриоттә лагерь аартра агәҭынчымра рызцәырнагоит адунеижәларбжьаратә уаажәларра - Адипломатцәа

 

Аҟәа, Уажәааигәа Қырҭтәылеи Аҧсни рҳәааҿы иаадыртыз, ақырҭуа патриоттә лагерь адунеижәларбжьаратә уаажәларра агәҭынчымра рызцәырнагеит. Абри атәы рҳәеит Еиду Амилаҭқәа Реиҿкаара Амаӡаныҟәгаҩ хада ақырҭуа-аҧсуа еиҿагылара аҭышәынтәалара азҵаараҿы идгылоу аҳәынҭқаррақәа рдипломатцәа, Аҧсны Апрезиденти Адәныҟатәи аусқәа рминистри злахәыз аҿы.

 

Аиҿагылара аҩганкгьы ааҳаҧхьоит, иҟарымҵарц азы убри аҩыза ашьаҿақәа, наҟ-ааҟ дара-дара ҕыҕзкыша- лҳәоит Германиа ацҳаражәҳәаҩ Патрициа Флор.

 

Қырҭтәыла иҟоу Урыстәыла ацҳаражәҳәаҩ, Виачеслав Коваленко, излеиҳәаз ала, абжьаҟазаҩцәа ирылшо зегьы ҟарҵоит, ақырҭуа еиҳабыра агәра ддыргарц азы Жәыргьыҭ араион Ганмухәри ақыҭаҿы иаадыртыз алагерь шарктәу.

 

Апрезидент Сергеи Багаҧшь иазгәеиҭоит, абас иҟоу ақырҭуа еиҳабыра иҟарҵоу ашьаҿақәа, иалшоит атрагедиахь уклнагар. Ари атерриториа аиҿагылара иаҭыҧуп. Араҟа иахәҭам ахәыҷқәа рзы алагер амҩаҧгара- иҳәоит Апрезидент.

 

Сергеи Багаҧшь адипломатцәа иреиҳәоит, аҳәара шыҟаиҵоу Еиду Амилаҭқәа Реиҿкаара анаҧшыҩцәеи урыстәылатәи абжьаҟазаратә мчқәеи рахь, ари араион аҟны еснагьтәи аҷаҧшьара мҩаҧыргаларц азы.

 

Иара убас, Аҳәынҭқарра Ахада иазгәеиҭоит, аҧсуа ган иҟанаҵоит иахәҭоу зегьы ари аҭыҧаҿы аҭынчра ахьчаразы. Араҟа ахыҷқәа рыҧсҭазаара азҵаара ықәглоуп. Ҳара иҳалшо зегьы ҟаҳҵоит залымдарак ҟамларц азы- иҳәеит С. Багаҧшь.

 

Ақырҭуа еиҳабырагьы ирхадмыршҭыроуп, рполитикатә хықәкы анагӡараз изызҳауа рҿар шаҿарыжьуа- иациҵеит Апрезидент.

 

08.06.2007  abkhaziagov.org

 

 Кәдрытәи аҩхаа хыхьтәи аган аҿы аҭагылазаашьа аҭышәынтәаларазы аиҿцәажәаратә процесс иалагазар алшоит иаарласӡаны - Апрездент

 

Аҟәа, Аҳәынҭқарра Ахада Сергеи Багаҧшь иҧхьаӡоит, Кәдрытәи аҩхаа хыхьтәи аган аҿы аҭагылазаашьа аҭышәынтәаларазы аиҿцәажәаратә процесс иалагазар алшоит ҳәа иаарласӡаны.   Убри атәы иҳәоит Апрезидент  Еиду Амилаҭқәа Реиҿкаара Амаӡаныҟәгаҩ хада иҩыза-аҳәынҭқаррақәа рҟынтәи ацҳаражәҳәаҩцәеи иареи ақырҭуа-аҧсуа еиҿагылара аҭышәынтәалара   иазкыз  реиҧылараҿы.

 

Аиқәшаҳаҭрақәа рынамыгӡара унанагоит  аиҿцәажәаратә процесс аанкыларахь,  убас иҟалеит  Кәдрытәи аҩхаа азҵаараҿгьы- иазгәеиҭеит Сергеи Багаҧшь, Адәныҟатәи аусқәа рминистр Сергеи Шамба ацҳаражәҳәаҩцәеи иреи реиҧылараҿы иазгәеиҭеит, аиҿцәажәаратә процесс аҿы ишыҟоу изықәныҟәатәу алкаа хадақәа, иаҳҳәозар Москватәи Гагратәи аиқәшаҳаҭрақәа рҿы ашәарҭадара иазкны ирыдыркылахьоу ауснагӡатәқәа, урҭ еилазгаз, Қырҭтәыла, аиҿцәажәаратә процессгьы шааннакылаз Кәыдрытәи аҩхаа абџьар алгатәуп. Адунеижәларбжьаратә уаажәларра иалдмыршароуп, уажәраанӡа ирыдыркылахьоу аиқәшаҳаҭрақәа Қырҭтәыла иахҟьаны реилагара. Иахьа Қырҭтәыла ианаҳажьыр Кәдры аҩҿхааҿы иҟоу аҭагылазаашьа, уаҵәы уи аҩыза ҟалар алшоит Гал араион аҿгьы. Ақырҭқәа рган ирдырроуп, адунеижәларбжьаратә уаажәларра ари аҩыза ахымҩаҧгашьа ишақәӡбо, насгьы урҭ ҩаҧхьа аиҿагылара зыруадаҩуа ашьаҿақәа дырҟаҵатәым- иҳәоит Сергеи Шамба.

 

Нас Адәныҟатәи аусқәа рминистр ацҳаражәҳәаҩцәа ирыдигалеит Кәдры аҩхаа азҵаара азбаразы аиҿцәажәарақәа рҿы иқәыргылатәу ажәалагалақәа. Ҳара иаадыруазароуп, 800-ҩык, хыхь Кәдры аҩхааҿы инхо ауааҧсыра, рыхьчаразы заҟаҩы абџьар иаҵагылар ахәҭозеи. Ҳара ҳазыхиоуп аҭыҧантәи ауаа рҟынтәи иалхны урҭ разыҟаҵара. Егьырҭ аҩхаа аанрыжроуп- иҳәоит Шамба. Апрезидент Сергеи Багаҧшь иқәиргылоит Кәдры аҩхааҿы ауаҩы изинқәа рыхьчаразы Еиду Амилаҭқәа Реиҿкаара Аофис Кәдры аартра азҵаара.

 

Иара убасгьы, аҧсуаа рган Кәдры аҩхаазы аилацәажәарақәа рҿы зегьы раҧхьаӡагьы иқәдыргылоит иахцоу аиҳабыра ралгара азҵаара. Иаҳа иманшәалоуп, иагьымариоуп урҭ Қарҭ Русҭавели имҩаду аҟны итәазар, ашьха иқәтәазар аасҭа- иҧхьаӡоит Апрезидент.

 

Џьаргьы иҳәаӡам, Кәдры аҩхааҿы акриминалтә елементқәа раанкылара аус хыркәшатәуп ҳәа, Аҧсны ашьауҕа иаҵоу ауаа уаҟа рыртәарала- иациҵоит Сергеи Багаҧшь.

 

08.06.2007  abkhaziagov.org

 

 Еиду Амилаҭқәа Реиҿкаара Амаӡаныҟәгаҩ хада иҩыза- аҳәынҭқаррақәа ргәыҧ Аҟәа ицәырырганы иҟоуп ажәалагала ҿыцқ

 

Аҟәа, Уацәы, ииун 7 рзы Аҧсныҟа иаараны иҟоуп Қырҭтәыла иҟоу, Еиду Амилаҭқәа Реиҿкаара Амаӡаныҟәгаҩ хада иҩыза-аҳәынҭқаррақәа,  рыцҳаражәҳәаҩцәа  ақырҭуа-аҧсуа еиҿагылара арҭышәынтәаларазы.

 

Асасцәа идикылараны дыҟоуп Аҧсны Апрезидент Сергеи Багаҧшь. Аиҧылара далахәхоит адәныҟаполитикатә хылаҧшра аиҳабы Сергеи Шамба.

 

Еиду Амилаҭқәа Реиҿкаара Амӡаныҟәгаҩ хада иҩыза-аҳәынҭқаррақәа ицәырырганы иҟоуп Аҟәа  ажәалагала ҿыцқәа аиҿагылара аҭышәынтәалара иазку аиҿцәажәаратә процесс ацҵаразы. Адунеижәларбжьаратә уаажәларра ирымоуп агәҭынчымра адипломатиатә процесс ахьынкылахаз, убри иахҟьангьы аиҿагылара аганқәа ирықәыҕәҕәараны иҟоуп, аиҿцәажәара иацыҵарц азы- иҳәоит Сергеи  Шамба.

 

Адәныҟатәи аусқәа рминистр агәыҕра имоуп аҧсуа аган иқәнаргыло азҵаарақәа ӡбахап ҳәа. Убарҭ азҵаарақәа  иреиуоуп- Аҧсны атәылауаҩы ақырҭқәа иҕьычны ирымоу Давид Сигәуа ирхынҳәреи, Кәдры аҩхаа абџьар алгареи.

 

07.06.2007  abkhaziagov.org

 

 Аҳҭнықалақь аиҳабыра рфинанстә усура ауаа ирбо-ираҳауа иаартны иҟалоит - Ақалақь аизара

 

Аҟәа, Аҟәа ахадара афинансттә усбарҭа иҟанаҵеит 2007 шықәса актәи аквартал абиуџьет анагӡашьа узырбо  аихшьаала.

 

Ааигәа Ақалақь аизара адепутатцәа Аҟәа аиҳабыра ирыдырҵеит, урҭ рфинансттә усура иазку  аинформациа  еиҧмырҟьакәа ажәлар рахь инаргаларц.

 

Иара убасгьы, аҳҭнықалақь адепутатцәа ирҭахуп, ақалақь ахадара аҟәшақәа реиҳабацәа есквартал русура иазкны ажәахәқәа ҟарҵаларц. Ааигәа Аизараҿы ажәахәқәа рыманы иқәгылеит аҳҭнықалақь аиҳабыра ахаҭарнакцәа аӡәырҩы.

 

Аҳҭнықалақь афинансттә усбарҭа иҟанаҵаз аихшьаала излаҳәо ала абиуџьет ахашәалахәы нагӡоуп 140%   инареиҳаны.

 

Аҳҭнықалақь Аизара ахада Адгәыр Амҷба иҧхьаӡоит, адепутатцәа иаҧшьыргаз, Аҟәа аиҳабыра рфинансттә усура ауаа ирбо-ираҳауа иаартны аҟаҵара, даара иахәҭоу усуп ҳәа.

 

Аҟәа ауааҧсыра ирдыруазароуп, шаҟа ҧара арҳауа ақалақь, насгьы урҭ шнырхуа. Ҳара ҳзы ихадароу усуп, аҳҭнықалақь аиҳабыра рфинансттә усура аартны аҟаҵара-иҳәоит А. Амҷба.

 

06.06.2007  abkhaziagov.org

 

 Атуристтә сезон алагамҭазы Қырҭтәыла Аҧсны аҭагылазаашьа еиҭаруадаҩуеит

 

Аҟәа, Москва  имҩаҧысыз  апресс-конференциаҿы  Аҧсны ахада  С.Багапҧшь  аҳәамҭа  ҟаиҵеит,  Қырҭтәыла  ессышықәса ишыҟанаҵац еиҧш Аҧсны атуристтә сезон алагамҭазы аҭагылазаашьа аруадаҩуеит.

 

Есышықса  ҳара  иаабоит  Аҧсны  атуристтә  сезон  алагамҭазы,  аполитикатә  ҭагылазаашьа  аруадаҩразы  

Қырҭтәыла иҟанаҵо аҽазышәарақәа- иҳәеит Сергеи Багаҧшь.

 

Аҧсны Апрезидент атуристцәа ирабжьигеит ақырҭуа еиҳабыра иҟарҵо аҳәамҭақәа рыгәхьаа мкыкәа Аҧсны  зыҧсы  зшьарц зҭаху зегьы, арахь иааиҧхьеит.

Сергеи Багаҧшь иажәақәа рыла, Аҧсны сынтәа даҽааамҭанык еиҧшымкәа атуристтә сезон иазхиоуп.

 

Аҳәынҭқарра  анапхгарала  имҩаҧгоуп  иаҭаху  аусқәа  зегьы. Ҳара  ҳазхиоуп  атуристцәа  рыдкылара,- инаҵшьны иазгәеиҭеит Апрезидент.

 

05.06.2007  abkhaziagov.org

 

 Аҧсни Алада Уаҧстәылеи Апрезидентцәа еицырзеиҧшу ааҧхьара ҟарҵеит Еиду Амилаҭқәа Реидгыла Амаӡаныҟәгаҩ хада иахь

 

Аҟәа, Ареспублика Аҧсны Апрезидент С.В.Багаҧшьи, Алада Уаҧстәыла Апрезидент Е.Д.Кокоитеи иҟарҵеит  еицырзеиҧшу ааҧхьара Еиду Амилаҭқәа Реидгыла Амаӡаныҟәгаҩ хада Пан Ги Муни, Ихьыҧшым  Аҳәынҭқаррақәа Реиҩызара ахадацәа Рхеилак Ахантәаҩы,  Ареспублика  Ҟазахсҭан  Апрезидент  Н.А. Назарбаеви, Ашәарҭадареи Аусеицуреи Европатәи Аиҿкаара Ахантәаҩы, Испаниа адәныҟатәи аусқәа рминистр М.А.Моратиноси, Европатәи ахеилак Амаӡаныҟәгаҩ хада Т.Девиси рахь.

 

05.06.2007  abkhaziagov.org

 

 Аусура иалагоит Аҧсны ашьауҕәатә кодекс ҿыц
 
 

Аҟәа, Ииун 1 инаркны аусура иалагеит  Аҧсны ашьауҕәатә кодекс ҿыц.    Уажәраанӡа ҳтәылаҿы аус ауан   асовет ҳәынҭқарраҿы ирыдыркылахьаз  ашьауҕәатә закәанҧҵа.

 

Апрезидент Иофициалтә саит ахь  Апрезидент Иадминистрациаҿы иҟоу аекономикеи азини рыҟәша ишаанацҳаз ала, Ашьауҕәатә кодекс ҿыц, уаанӡа рхы иадырхәоз  азакәанҧҵа, излеиҧшым еиҳаракгьы атәылауаҩы изинқәа рыхьчара аҧхьагылара ахьаузоуп, асоветтә кодекс аҿы зегь раҧхьа игылан аҳәынҭқарра ахьчара аинтересқәа.  Абри апринцип ауп адемократиатә ҳәынҭқарра аргылараҿы хадарас иҟоу.

 

Асоветтә ашьауҕәатә кодекс аҿы зегьы раҧхьа игылан аҳәынҭқарра аинтересқәа, нас ауаажәларра ринтерес, убарҭ рышьҭахь акәын ауаҩы изин ахьчара ахьгылаз. Ҿыц ирыдыркылаз Акодекс ҿыц аҟны актәи аҭыҧ аҿы игылоуп ауаҩы изинқәа рыхьчара, нас ауаажәларра, аҵыхәтәаны -аҳәынҭқарра- иазгәарҭоит Аҳәынҭқарра Ахада  Иаппарат азин аҟшаҿы.

 

Акодекс апроект акыраамҭа аус адырулон. Ашьауҕәатә закәанҧҵараҿы ареформа мҩаҧгара  иалахәын  аҳәынҭқарра ахмчык рхаҭарнакцәа рыдагьы, аиуристцәа апрактикцәа, Аҧснытәи аҳәынҭқарратә университет  аусуҩцәа, иара убасгьы егьырҭ аекспертцәа.

 

01.06.2007  abkhaziagov.org

 

 Аҧсны излалшо зегьы рыла Алада Уаҧстәыла иадгылоитАпрезидент

 

Аҟәа, Аҳәынҭқарра Ахада Сергеи Багаҧшь Жәлар реизарахь иҟаиҵаз Ааҧхьараҿы иазгәеиҭеит, Аҧсны иалшо зегьы шыҟанаҵо Алада Уаҧстәыла иадгыларц азы.

 

Иахьа Алада Уаҧстәыла аибашьра ахықә иқәгылоуп. Қырҭтәыла аҿуп аҭагылазаашьа аруадаҩра,  ҧхьаҟагьы  аибашьрахь икылнагар алшоит- иҳәеит Апрезидент.

 

Зегьы ирдыруазааит, Алада Уаҧстәыла ажәлар рхала арыцҳараҿы ишаанҳмыжьуа, иҳалшо зегь ала ҳашрыцхраауа. Адунеижәларбжьаратә уаажәларра иазхәыцыроуп, Қырҭтәыла имҩаҧнаго аполитика иахькылнаго. Алада Уаҧстәыла излаго аибашьра, уи Алада Кавказ зегьы ианыруеит-иҳәоит Сергеи Багаҧшь.

 

Апрезидент аполитикатә еилазаарақәа зегь рахь ааҧхьара ҟаиҵеит, Алада Уаҧстәыла зҭагылоу аситуациа ахәшьара арҭарц.  Сара исҭахуп срыҳәарц адепутатцәа, апартиақәеи, аполитикатә ҵысрақәеи рхаҭарнакцәа  Алада Уаҧстәыла иадгыларц- иҳәоит С. Багаҧшь.

 

01.06.2007  abkhaziagov.org