AҦCУAA  PЫБЖbbI
-------------------- Aҧcнынтәиәабжь ҿыцқәа --------------------


 
 Аҧсны Аҳәынҭқарра Ахада С.Багаҧшь идикылеит Урыстәылантә аделегациақәа

 

Аҧсны Аҳәынҭқарра Ахада С.Багаҧшь идикылеит иахьа, аҳәаанырцәтәи атәылақәа рҿы арегионбжьаратәи акультуратәи еимадарақәа рзы Урыстәыла Афедерациа Апрезидент Иусбарҭа аиҳабы ихаҭыҧуаҩ Игор Маслови, Ари Аусбарҭа Адепартамент Аиҳабы Сергеи Чеботареви, Евразиатәи аҭҵаарақәа ринститут Афонд Апрезидент Валерии Турсунови, иара убасгьы Москва Зеленоградтәи аокруг апрефект ихаҭыҧуаа Анатолии Хурхумови Алексеи Немериуки.

 

Арҭ аҩ делегациак арҭ амшқәа рзы усуратә визитла Аҧсны иааны иҟоуп. Зеленоградтәи аокруг Апрефектуреи Очамчыра араион Ахадареи, ааигәа рнапы аҵарҩит аусеицуразы Аиқәшаҳаҭра.

 

Аҧсны Аҳәынҭқарра Ахада асасцәа иахьа иазгәарҭо Урыстәыла амш рыдиныҳәалеит.

 

Аибашьра ашьҭахь иуадаҩын аекономикатә блокада аҭагылазаашьаҟны Аҧсны аинфраструктура ашьақәыргылара. Ҳара ҭабуп ҳәа иаҳҳәоит Владимир Путин Аҧсны аекономикатә санкциа арежим аҧыхра зыбзоуроу.Ари ишьақәнарҕәҕәоит Урыстәыла ҳашҟа иамоу азыҟазаашьа бзиа. иҳәеит С.Багаҧшь.

 

Аҳәаанырцәтәи атәылақәа рҿы арегионбжьаратәи акультуратәи еимадарақәа рзы Урыстәыла Афедерациа Апрезидент Иусбарҭа аиҳабы ихаҭыҧуаҩ Игор Мослов иазгәеиҭеит,  иахьа рашәарамза 12 ари аныҳәа ду, Урыстәыла ибзиан иазыҟоу зегьы рзы акзаара ишасимволу.

 

12.06.2008  Аҧсны Аҳәынҭқарра Ахада Аофициалтә Саит

 

 Аҧсны имҩаҧысуа ашколхәыҷқәа 5 тәи рспартакиадаҟны Аҟәатәи аҵаҩцәа аҧхьагылара рымоуп

 

Ареспублика ахьыҧшымра 15 шықәса ахыҵра аҳаҭыразы, Аҧсны имҩаҧысуеит ашколхәыҷқәа 5 тәи рспартакиада.

 

Есышықәса аҵаҩцәа рхыҧхьаӡара еизҳауеит. Ари ашықәс азы 900 ҩыуаак рҟынӡа алахәуп. Арҭ Аҧсны ақалақьқәеи араионқәеи рҟны еизгоу командақәоуп, иҳәеит аҵара аминистрра аспорти абаҩрҵәыреи рзы аспециалист хада Аслан Ҭаркьыл.

 

Аспартакиада мҩаҧысуеит Ареспубликатә хәыҷтәы хәмаррақәа ршколи, абокси ақәҧареи ршколқәеи рбазала. Ҵандрыҧшьтәи алицеи интернат аҟны иҩаҧысуеит ампыл асразы аицлабрақәа.

 

Аҟәатәи ашколхәыҷқәа атлетика ласи, ашахмати, абокси, астолтә тенниси, амҵәышәымпыли рзы аҧхьагылара рымоуп. Аҩбатәи аҭыҧ аҿы арҭ аспорт хкқәа рзы Гагра ақалақь аҿы еизгоу акоманда, ахҧатәи Гудоҭатәи ашколхәыҷқәа.

 

Иахьа имҩаҧысуан амҵәышәымпыл азы аицлабрақәа. Афиналтә хәмаррақәа мҩаҧгахоит ҧхынгәы 14 азы. Аспартакиада апрограммаҿы иарбоуп, иара убасгьы аҧсуа жәлар рыхәмаррақәа.

 

11.06.2008  Аҧсны Аҳәынҭқарра Ахада Аофициалтә Саит

 

 Аҧсны аҳазалхратә еилак шықәсыбжактәи аплан иаҧгаланы инанагӡеит

 

Аҧсны аҳазалхратә еилакы, 10 шықәса раахыс, раҧхьаӡа акәны аҳазалхратә шәахтәқәа рзы иаҧгаланы аплан нанагӡеит.

 

Аҳәынҭқарратә ҳазалхратә еилакы, рашәарамза 10 рзтәи аҟаҵарбақәа рыла, аҳәынҭқаррахь иаланагалеит 127 миллион мааҭ, уи аплан ирзарбаз аасҭа 6 миллионк рыла еиҳауп. Абри атәы ааицҳауеит Аҳәынҭқарратә ҳазалхратә еилакы астатистика аҟәша аиҳабы Ельдар Шохин.

 

10.06.2008  Аҧсны Аҳәынҭқарра Ахада Аофициалтә Саит

 

 Рашәарамза 17 инаркны 21 нӡа Пицунда имҩаҧгахоит Жәларбжьаратәи аекономикатә форум Аҧсны 2008 Аинвестициақәеи, аперспективақәеи

 

Рашәарамза 17 инаркны 21 нӡа Пицунда имҩаҧгахоит Жәларбжьаратәи аекономикатә форум Аҧсны 2008. Аинвестициақәеи, аперспективақәеи. Уи еиҿнакаауеит Ареспублика Аҧсны Ахәҳахәҭра ааглыхратә палата Аиҳабыра рыцхыраарала.

 

Афорум алахәлацәа Аҧсны еиуеиҧшым аекономикатә хырхарҭақәа рҟны аинвестициатә проектқәеи апрограммақәеи ирылацәажәараны иҟоуп. Хәҭакахьала, ажәалагалақәа ҟаҵахоит ақыҭанхамҩеи, ааглыхреи, ааглыхра аус адулареи, ахәҳахәҭреи, афымцалашареи, атранспорти аинвестициақәа ралагаларазы.

 

Аекономикатә форум аусура иалахәхоит Урыстәыла Афедерациа Аахыҵтәи Афедералтә округ ахәҳахәҭра ааглыхратә палата ахаҭарнакцәеи, иара убасгьы Ҭырқәтәыла аус знапы алакыу рхаҭарнакцәеи.

 

09.06.2008  Аҧсны Аҳәынҭқарра Ахада Аофициалтә Саит

 

 Аҧсны аделегациа Ҭырқәтәылантә ихынҳәит

 

Аҧсны Адәныҟатәи Аусқәа рминистр С.Шамба зхадараҿы дыҟаз аделегациа Ҭырқәтәылантә ихынҳәит. Уи аилазаараҟны иҟан Аҧсны Жәлар Реизара адепутатцәа арепатриантцәа Сенер Гогәуеи Ҭаали Ҳәатышьи.

 

Аделегациа ааҧхьара рнаҭеит Ерфан Аргәын напхгара зиҭо Аҧсны азааигәахаразы Сҭампылтәи Ахеилак.

 

Аҧсны ахаҭарнакцәа  еиуеиҧшым ақалақьқәеи араионқәеи рҟны инхо аҧсуа мҳаџьырқәа рхылҵышьҭрақәа ирҧылеит.

 

Аҧсны Адәныҟатәи Аусқәа рминистр Ҭырқәтәыла иҟазараан аинтервиу риҭеит еиуеиҧшым агазеҭқәеи, аинформациатә агентрақәеи, дырҧылеит аҭҵааратә еилазаарақәа рхаҭарнакцәа. Анкара имҩаҧысит Ҭырқәтәыла иҟоу Урыстәыла ацҳаражәҳәаҩи С.Шамбеи реиҧылара.

 

Имҩаҧысит аинтерес зҵаз аиҿцәажәарақәа. Иалацәажәон Ҭырқәтәылеи Аҧсни рыбжьара амшынтә мҩа аартра шаҭахыу, ҳдиаспора рҭоурыхтә ҧсадгьыл ахь лассы лассы иаалартә еиҧш аҭагылазаашьа рзаҧҵаразы, азгәеиҭеит С.Шамба.

 

09.06.2008  Аҧсны Аҳәынҭқарра Ахада Аофициалтә Саит

 

 Европатәи Аидгыла ықәгылоит агәреибагара арҕәҕәареи аҧсуа қырҭуатә еимакы ҭынчымҩала аӡбареи рзы

 

Аиҧылара мҩаҧысит  аилибакаареи аҧхарреи аҵаны. Хавиер Солана Еврпатәи Аидгыла аимак аҭышәныртәалараҿы апозициа дазааҭгыло, иазгәеиҭеит, аиҿцәажәарақәа реиҭарҿыцразы ишаҭахыу агәреибагарақәа, ишаҭахыу аамҭеи аҽазышәареи, иара убасгьы иҳәеит апроблема шыӡбатәу ҭынчымҩалеи политикатә мҩалеи, иара убасгьы иазгәеиҭеит араҟа УрыстӘыла инанагӡо ароль шхадаратәыу.- Абри атәы иҳәеит, Аҧсны Аҳәынҭқарра Ахадеи Европатәи Аидгыла адәныҟатәи аполитикеи ашәарҭадареи Иреиҳаӡоу Ркомиссари реиҧылара иалахәыз Аҧсны Ашәарҭадара Амаӡаныҟәгаҩ Станислав Лакоба.

 

Лакоба иажәақәа рыла, Солана инаҵшәьны иазгәеиҭеит, аҵак ду шарҭо иҟалараны иҟоу Медведеви Путини рҧылара.

 

06.06.2008  Аҧсны Аҳәынҭқарра Ахада Аофициалтә Саит

 

 С. Багаҧшь:Ҳара ҳазхиоуп Европатәи Аидгыла атәылақәеи ҳареи ҳабжьара аекономикатә усеицура азҵаара аӡбара

 

Ҳара ҳазхиоуп Европатәи Аидгыла атәылақәеи ҳареи ҳабжьара аекономикатә усеицура азҵаара аӡбара.Абри атәы ажурналистцәа иреиҳәеит Аҧсны Аҳәынҭқарра Ахада С.Багаҧшь, Европатәи Аидгыла адәныҟатәи аполитикеи ашәарҭадареи Иреиҳаӡоу Ркомиссари иареи реиҧылара анхыркәшаха ашьҭахь.

 

Ҳара уаанӡагьы иаҳҳәахьан, ҳшазыхиоу Европатәи Аидгыла атәылақәеи ҳареи ҳабжьара аекономикатә еизыҟазаашьақәа рызҵаара аӡбара. Европатәи Аидгыла ҳрегион иазааигәахеит. Ҳара ҳазҿлымҳауп аҳаиртәи амшынтәи еимадарақәа реиҭашьақәыргылара, иҳәеит Багаҧшь.

 

06.06.2008  Аҧсны Аҳәынҭқарра Ахада Аофициалтә Саит

 

 С.Багаҧшь:аиҿцәажәарақәа реиҭарҿыцразы ихадоу дҵаҟаҵараны иаанхоит Кәыдры аиҩхаа аҩадатәи ахәҭа аҟынтә ари абџьари ралгара

 

Ҳара ҳпозициа ҧсахрада иаанхоит аиҿцәажәара апроцесс аиҭарҿыцразы, - иҳәеит Аҧсны Аҳәынҭқарра Ахада С.Багаҧшь Европатәи Аидгыла адәныҟатәи аполитикеи ашәарҭадареи Иреиҳаӡоу Ркомиссар иареи реиҧылара анхыркәшаха ашьҭахь. Сара еиҭахгьы исҳәоит, ихадоу дҵаҟаҵараны иаанхоит аиҿцәажәарақәа реиҭарҿыцразы,  Кәыдры аиҩхаа аҩадатәи ахәҭа аҟынтә ақырҭуа архәҭақәеи атехникеи ралгара, аихымца аанкылареи амчқәа реидыгареи рзы лаҵарамза 14, 1994 шықәсазы анапы зҵаҩыз Аиқәшаҳҭра аҭагылазаашьа иақәшәо аҟаҵареи, Қырҭтәыла аибашьра аиҭамырҿыцразы аиқәшаҳаҭра анапаҵаҩреи.

 

Урыстәылатәи Абжьаҟазаратә Мчқәа рызҵаара дазааҭгыло, Багаҧшь инаҵшьны иазгәеиҭеит: Аимак азонаҿы Урыстәылатәи абжьаҟазацәа ирыцназго ыҟам. Урҭ даҽа мчқәак рыла рыҧсахра азҵаара алацәажәара ҳгәы иҭаӡам.

 

Қырҭтәыла иаҭахызар Абжьаҟазаратә Мчқәа ртерриториа аҟнытә ралгара, ҳара урҭ Аҧсны иаанхарц азы иҳалшо зегьы ҟаҳҵоит, инаҵшьны иазгәеиҭеит Аҳәынҭқарра Ахада.

 

06.06.2008  Аҧсны Аҳәынҭқарра Ахада Аофициалтә Саит

 

 Хавиер Солана: Сергеи Багаҧшьи сареи ҳабжьара имҩаҧысит аиҿцәажәара бзиа

 

Сергеи Багаҧшьи сареи ҳабжьара имҩаҧысит аиҿцәажәара бзиа. Ақырҭуа аҧсуа еимакы аҭышәныртәаларазы,  сара иреилсыркааит Европатәи Аидгыла апозициа, ҳәа ажурналистцәа иреиҳәеит аиҧылара анхыркәшаха ашьҭахь Европатәи Аидгыла адәныҟатәи аполитикеи ашәарҭадареи  Иреиҳаӡоу Ркомиссар Хавиер Солана.

 

Европатәи Аидгыла аинтерес амоуп ақырҭуа аҧсуа еимакы азонаҿы аҭагылазаашьа аҿиашьа. Ҳара иаҳҭахыуп ацхыраара ҟаҳҵарц аҭагылазаашьа аҭышәныртәалараҿы, иҳәеит адипломат.

 

Сара ҩынтәуп Аҧсны Аҳәынҭқарра Ахада сиҧылоижьҭеи, сгәы иаанагоит, ҳаиҧылара аинтерес аҵан ҳәа, ҳаицәажәара мҩаҧысуан акыраамҭа. Сара ҳаиҿцәажәара исзыннажьит агәалаҟазара бзиа.

 

Ақырҭуа аҧсуа еимакы аҭышәныртәалара аперспективақәа дырзааҭгыло, Европатәи Аидгыла ахаҭарнак инаҵшьны иазгәеиҭеит, Урыстәыла аламырхәыкәа даҽа ӡбашьак шамам.Урыстәыла аимак аҭышәныртәалара апроцесс аҿы ихадоу ароль нанагӡоит. Европатәи Аидгылагьы азыхиоуп аиҿцәажәаратә процесс активла ахалархәра, азгәеиҭеит Солана.

 

Уи иҳәеит, рашәарамза анҵәамҭазы, планс ишрымоу Европатәи Аидгыла ахаҭарнакцәа Владимр Путини Дмитри Медведиеви алархәны Урыстәылатәи рпартниорцәа рҧылара.Урыстәылеи ҳареи аизыҟазаашьа бзиақәа ҳамоуп, азгәеиҭеит Хавиер Солана. Убри аан, Солана инаҵшьны иазгәеиҭеит, аҧсуа қырҭуатә еимакы аӡбара аимак змоу аганқәа шракәу изусу. Адгылара аиуеит аимак змоу аганқәеи Европатәи Аидгылеи рыбжьара иарбан еимадаразаалак, - инаҵшьны иазгәеиҭеит адипломат.

 

06.06.2008  Аҧсны Аҳәынҭқарра Ахада Аофициалтә Саит

 

 Д.Медведеви М.Саакашвилии Аҧсны аихамҩа аиҭашьақәргылара азҵаара иалацәажәеит

 

Урыстәыла Афедерациа Апрезидент Дмитри Медведев. Рашәарамза 3 рзы, ҭелла диацәажәеит Қырҭтәыла Аҳәынҭқарра Ахада М.Саакашвили. Абри атәы аанацҳауеит Кремль апресс маҵзура, иара убасгьы иазгәаҭатәуп, ақырҭуа ган аҧшьгарала шакәыз аицәажәара шымҩаҧысуаз.

 

Аицәажәараҿы иазааҭгылан Аҧсны аихамҩа аиҭашьақәыргыларазы Урыстәыла ацхыраара азҵаареи,иара убасгьы арҭ ауснагӡатәқәа рзы Урыстәыла Афедерациа Аихамҩатә архәҭақәа рыҟәшақәа ари аусхк ралархәра, ҳәа адырра ҟарҵеит апресс маҵзураҿы.

 

Урыстәылатәи аихамҩатә архәҭақәа Аҧсны аихамҩа аиҭашьақәыргылара нап адыркит.400 ҩыуаак инареиҳаны аррамаҵзуцәа 54 километр иахьаҵанакуа аихамҩа шьақәдыргылароуп.

 

04.06.2008  Аҧсны Аҳәынҭқарра Ахада Аофициалтә Саит

 

 Ашәарҭадаратә Хеилак аилатәараҟны, Қырҭтәыла иҟанаҵаз аҽазышәара авиациатә хҭысқәа рзы Урыстәыла ахара адҵаразы лҵшәа маиуӡеит

 

Лаҵарамза 30 рзы, Қырҭтәыла аҧшьгарала имҩаҧысит ООН Ашәарҭадаратә Хеилак аофициалтә еилатәара, Қырҭтәыла анаҧшразы ООН амиссиа ажәахә аилыргара, мшаҧымза 20 рзы Аҧсны аҳаиртә ҳәааҟны аҭыҧ змаз авиациатә хҭыс аҭцааразы.
Урыстәыла Адәныҟатәи Аусқәа рминистрра акьыҧхьи аинформациеи Рдепартамент излаанацҳауала, Қырҭтәыла хықәкыс иаман, иҭархаз аҳаирплан ҧшыхәҩы азы аҭакҧхықәра Урыстәыла иаднаҵарц, убриалагьы аҧсуа қырҭуатә еимакы аҭышәныртәалараҿы Урыстәыла абжьаҟазаратә Мчқәа рроль аларҟәроуп.

 

Ашәарҭадаратә Хеилак  аҟны аҧыррақәа реилыргара аан, Урыстәыла аара адҵаразы ақырҭқәа рҿазышәара, еиҭахгьы лыҵшәа маиуӡеит. Ақырҭуа позициа ахьчаразы, зегь раҧхьа активла иқәгылеит америкаа. Егьырҭ иқәгылақәоз еиҳа рҽааныркылеит, аҧыжәара арҭеит Қырҭтәыла анаҧшразы ООН амиссиа амониторингтә ҭагылазаашьақәа рырҕәҕәареи, аҧсуа қырҭуатә еиҿцәажәарақәа иаарласны реиҭашьақәыргылареи. Ахеилак гәҧҩык алахәлацәа, ацәажәарақәа зынӡагьы рхы аладмырхәӡеит, инаҵшьны иазгәанаҭеит Урыстәыла Адәныҟатәи Аусқәа рминистрра.

 

Урыстәыла ахаҭарнак, авиациатә хҭыс азы ҳпозициа еилкааны ишьақәирҕәҕәеит. Урыстәыла иазгәанаҭеит, хыҧхьаӡара рацәала ақырҭуа ҧырҩыдатәи аҳаирпланқәа Аҧсны аҳаиртә ҳәаа аҟны рыҧырра, уи 1994 шықәсазтәи Москватәи  аихымца аанкылареи амчқәа реидыгареи рзы Аиқәшаҳаҭреи, иара убасгьы ООН Ашәарҭадаратә Хеилак арезолиуциа 1808 аилагароуп. Иазгәаҭатәуп, Қырҭтәыла анаҧшразы ООН амиссиа ажәахә аҟны иаҳәоит, аҭыҧ змаз ақырҭуа ҧшыхәратә ҳаирпланқәа рыҧырра Москватәи Аиқәшаҳаҭра аҿагылароу ҳәа. Урыстәыла ақырҭқәа рахь ааҧхьара ҟанаҵоит арҭ апровокациатә ҧыррақәа ирҟәаҵырц, иара убасгьы рхыдҵақәа нарыгӡаларц, ирықәныҟәаларц ООН Ашәарҭадаратә Хеилак ааҧхьарақәа, ҳәа адырра ҟанаҵоит Урыстәыла адәныҟаполитикатә хылаҧшырҭа.

 

Ахеилак аилатәараҟны. Адырраҭараҿы ишазгәаҭоу аиҧш, Урыстәыла ахаҭарнак инаҵшьны иазгәеиҭеит, арҭ аҭыҧ змоу ахҭысқәа Қырҭтәылеи Аҧсни рыбжьара шакәу иахьымҩаҧысуа, убри аҟнытә, аҧсуа ган аламырхәыкәа ари азҵаара аҭҵаара ииашахо ҳәа.

 

02.06.2008  Аҧсны Аҳәынҭқарра Ахада Аофициалтә Саит